Uanzishwaji wa Sekretarieti ya Kudumu kwa Mashindano ya Kimataifa ya Qur'ani ya Iran
Maafisa kadhaa wa Qur'ani, mameneja na wanaharakati walishiriki katika mkutano huo.
Kati ya mada zilizosisitizwa katika mkutano huo ni pendekezo la kusajili tukio hilo la kimataifa la Qur'ani katika UNESCO kama urithi wa kiroho na kuanzisha sekretarieti ya kudumu ya mashindano hayo.
Mkutano ulianza kwa kisomo cha aya za Qur'ani Tukufu na Vahid Khazaei, kisha ripoti ikatolewa na Mohammad Shakiba, naibu mkuu wa Kituo cha Masuala ya Qur'ani cha Shirika la Wakfu na Masuala ya Hisani, kuhusu toleo la 41 la mashindano hayo yaliyofanyika mwaka jana.
Alibainisha kuwa nchi 104 zilikuwa na wawakilishi wao katika mashindano hayo, na baada ya uteuzi wa awali, wasomaji wa Qur'ani na wahifadhi kutoka nchi 28 walifika fainali.
Aidha, alisema mialiko imeandaliwa ili kutumwa kwa nchi mbalimbali kwa ajili ya toleo la mwaka huu.
Mohammad Taqi Mirzajani, naibu wa utafiti na mipango wa Baraza Kuu la Qur'ani, alizungumzia vipengele vitatu vya mashindano hayo, yaani washiriki, jopo la majaji, na hadhira.
Alisema kwamba mipango maalum inapaswa kuwepo kwa kila moja ya makundi haya.
Khandaqabadi, mwakilishi kutoka idara ya kimataifa ya Ofisi ya Kiongozi wa Mapinduzi ya Kiislamu, pia alikuwa mzungumzaji katika mkutano huo.
Alisema kwamba suala la kuendelea kuwasiliana na washiriki na waamuzi ni muhimu sana.
Ikiwa waandaaji wa mashindano wataanzisha sekretarieti ya kudumu, sekretarieti hiyo itatoa jukwaa la mawasiliano na maendeleo ya kiakili kwa washiriki, alisema.
Kisha, Seyed Mohammad Reza Qassemtabar, mkurugenzi wa Thaqalayn TV, alisisitiza umuhimu wa diplomasia ya Qur'ani.
"Lazima tujibu swali, nini kinapaswa kufanyika ili washiriki katika mashindano hayo, baada ya kurejea katika nchi zao, waweze angalau kuimarisha jamii zao za ndani (katika masuala ya Qur'ani)."
Jalil Bayt Mash’ali, mkuu wa Shirika la Qur'ani la Wasomi wa Iran, pia alizungumza katika mkutano huo, akisisitiza haja ya kuzingatia zaidi suala la uwajibikaji wa kijamii katika mashindano hayo.
Baadaye, Mojgan Khanbaba, mwanaharakati mkongwe wa Qur'ani, alitoa wito wa kusajili mashindano hayo katika UNESCO kama urithi wa kiroho.
Mashindano ya Kimataifa ya Qur'ani Tukufu ya Jamhuri ya Kiislamu ya Iran huandaliwa kila mwaka na Shirika la Wakfu na Masuala ya Hisani nchini.
Lengo lake ni kuendeleza utamaduni na maadili ya Qur'ani miongoni mwa Waislamu na kuonesha vipaji vya wasomaji na wahifadhi wa Qur'ani.
3492958
